Full Lyrics
Bey Gott findt man der gnaden vil
darumb ich zu im flehen will
bey menschen ist es als verlorn
in sünden sind sie all geborn
durch Adams fall
im paradieß
der Schlangen biß und falsche weiß
wir kamen all in dise zal
der tod fürt uns am reyen
biß uns Christus thet freyen
von dem schedlichen schlangenbiß
wer Christo glaubt der hats gewiß.
Darauff find schon ein grosse zal
und auch die Väter allzumal
in Christo eingeschlaffen
wann sie der Schlangenbiß anfacht
gab in nit vil zu schaffen
darumb sie waren all gewiß
Christus hat in den Schlangenbiß
mit seinem blut verbunden
sie wurden tröst
und all erlöst
durch Christi blut und wunden.
