Full Lyrics
Beatus ille qui procul negotiis
ut prisca gens mortalium
paterna rura bobus exercet suis
solutus omni faenore
nec excitatur classico miles truci
nec horret iratum mare
forumque vitat et superbum civium
potentiorum limina.
Ergo aut adulta vitium propagine
altas maritat populos
aut in reducta valle mugientium
prospectat errantes greges
inutilesque falce ramos amputans
feliciores inserit
aut pressa puris mella condit amphoris
aut tondet infirmas oves.
Libet jacere modo sub antiqua ilice
modo in tenaci gramine
labuntur altis interim ripis aquae
queruntur in silvis aves
fontesque limphis obstrepunt manantibus
somnos quod invitet leves.
Beatus ille qui procul negotiis
ut prisca gens mortalium
paterna rura bobus exercet suis.
