Full Lyrics
Christum ducem, qui per crucem
nos redemit ab hostibus,
laudet cantus noster laetus,
exsultet coelum laudibus.
Poena fortis tuae mortis,
et sanguinis effusio,
corda terant ut te quaerant
Jesu nostra redemptio.
Per felices cicatrices,
sputa, flagella, verbera,
nobis grata, sunt collata
aeterna Christi munera.
Nostrum tangat cor, ne plangat,
tuorum sanguis vulnerum,
in quo toti sumus loti,
conditor alme siderum.
Passionis tuae donis
Salvator nos inebria,
qua fidelis dare velis,
beata nobis gaudia.
