Full Lyrics
Ave, præclara maris stella, in lucem gentium, Maria, divinitus orta.
Euge, Dei porta, quæ non aperta, veritatis lumen, ipsum Solem justitiæ, indutum carne, ducis in orbem.
Virgo decus mundi, Regina cœli, præelecta ut sol, pulchra lunaris ut fulgor, agnosce omnes te diligentes.
Te plenam fide, virgam almæ stirpis Jesse nascituram, priores desideraverant patres et prophetæ.
Te lignum vitæ, sancto rorante pneumate parituram divini floris amygdalum, signavit Gabriel.
Tu Agnum, regem terræ dominatorem, Moabtici de petra deserti ad montem filiæ Sion traduxisti.
Tuque furentem Leviathan, serpentem tortuosumque et vectem collidens, damnoso crimine mundum exemisti.
Hinc gentium nos reliquiæ, tuæ sub cultu memoriæ mirum in modum quem es enixa propitiationis Agnum, regnantem cœlo æternaliter, devocamus ad aram, mactandum mysterialiter.
Hinc manna verum Israëlitis veris, veri Abrahæ filiis admirantibus quondam Moysi quod typus figurabat: jam nunc abducto velo datur perspici. Ora, virgo, nos illo pane cœli dignos effici.
Fac fontem dulcem, quem in deserto petra præmonstravit, degustare cum sincera fide, renesque constringi lotos in mari, anguem æneum in cruce speculari.
Fac igni sancto Patrisque Verbo quod, rubus ut flammam, tu portasti, virgo mater, facta pecuali pelle discincto pede, mundis labiis cordeque propinquare.
Audi nos, nam te Filius nihil negans honorat.
Salva nos, Jesu, pro quibus Virgo Mater te orat.
Da fontem boni visere, da puræ mentis oculos in te defigere.
Quo hausto, sapientiæ saporem vitæ valeat mens intelligere,
Christianismi fidem operibus redimire, beatoque fine ex hujus incolatu, sæculi auctor, ad te transire.
