Full Lyrics
Adest dies triumphalis in qua sponsus inmortalis sponsae reddit praemia.
Prosequamur ergo digne, decertantis Catharinae triumphos et proelia.
Virtus ei denegatur, sed de caelo ministratur iugis alimonia.
Alta virgo stirpe sata, Christo fide consecrata, iussa spernit regia.
Iudex motus laniari sanctam iubet et arctari gravi sub custodia.
Per columbam sustentatur, angelorum animatur ad pugnam frequentia.
Convocatos oratores, sua Christi confessores fecit sapientia.
Virgo poenis non terretur, stat virago, non movetur promissorum gratia.
[Scorpione laceratur prece rota dissipatur, et poenalis machina].[Verse not included in this setting]
Triumphante Catharina, sua multi cum regina respuerunt numina.
Tandem rege triumphato, et agone consummato ferro subit aethera.
Pro cruore lac manavit Sina corpus collocavit, angelorum dextera.
Sacrum tumba fert liquorem, salutarem stillat rorem et minuta ossula.
Aegris confert sanitatem virgo nobis sanctitatem impetret per saecula. Amen.
